廣州廣州友誼商店

位于環市東路嘅廣州友誼商店，每當夜幕降臨，溢彩流光，幾靚啵。

時光倒流二十年，嗰陣時嘅廣州友誼商店就巴閉啰，喺上個世紀８０年代初，進口商品對一般廣州市民有住好強嘅吸引力，而友誼商店又係廣州少數可以買到進口商品嘅地方。

講起廣州友誼商店，有樣嘢哩絕對係同佢有關嘅，就係外匯券。乜東東嚟嘅？佢係我國改革開放初期，由中國銀行發行嘅一種替代外幣喺中國境內流通，同人民幣等值嘅人民幣憑證。嗰陣時冇呢味嘢，你都唔使只易入去買嘢。

記得嗰陣時有華僑親戚返嚟廣州，喺佢帶住去過友誼商店——門口。因為啱啱開始，一般人係唔能夠入去嘅，所以親戚攞住外國護照同外匯券入去買嘢，我就喺門口等啰。需然入唔到去，但係食到里面啲嘢，梗係開心啦。后嚟先至慢慢開放，只要有外匯券，就自由出入買嘢。

外父當年由于工作關系，唔單止好易有外匯券，仲可以經常出入友誼商店，買啲進口嘅糖果餅干、面包牛奶返屋企。我老婆嗰陣就有口福啰，經常有啲好嘢吃，搞到隔離左右啲細路仔細路女都唔知幾羨慕。外父待人好好，嗰陣時嘅廣州人，千方百計都諗住揾到幾蚊外匯券嚟買啲進口貨。外父會幫助啲親戚，幫佢哋買啲嘢同埋換啲外匯券。

老婆一直都中意去友誼買嘢，嗰女啲用品啦，佢自己著嘅衫，買俾我嘅衫，最勁抽就係早期買咗部奧林巴斯嘅相機。我諗，佢除咗覺得友誼嘅商品好之外，對友誼似乎有住一種特殊嘅情結。可以講友誼喺度伴隨著一代人嘅成長，伴隨住我哋生活嘅變化。即使係再過二十年，我諗，我哋嘅手中，仲會攞住友誼嘅發票。

識飲識食

無雞不成宴，廣州人對食雞係情有獨鐘。逢年過節，請客食飯，冇雞上枱，點見得人?。V州以前出名嘅雞有東江鹽焗雞、清平雞、花雕雞、九記路邊雞、太爺雞等等，凡是飯店酒樓都有佢哋嘅拿手好雞。一只雞，廣州人可以做到花樣百出，食味不同。一煲老火湯，飲早茶，吃海鮮，外省人都學到十足啦。喺外省吃正宗粵菜係飲食時尚，價錢唔平。

食在廣州，應該唔單止凈係指粵菜，應該更加廣義一啲。廣州係一個包容、自古以嚟就係一個開放嘅城市，各種飲食文化都可以喺呢度揾到佢哋嘅蹤影，各種唔同飲食文化喺呢度發揚光大。國外嘅有清真餐廳，阿拉伯民族嘅美食，越南菜、日本菜、泰國菜、韓國菜、西餐等；國內嘅有湘菜、川菜、東北菜；省內嘅有客家菜、潮州菜、順德菜。廣州已經成為以粵菜為主，包羅其它風格嘅一個美食天堂。除咗啲主打菜系之外，各地嘅美食都有云集廣州，足不出廣州，你都可以品嘗到國內外嘅各種美食。

大家喺呢度以食會友，共享親情，將民以食為天嘅內涵發揮到咗極致。每一個黃金周，每一個父母親節，每一個情人節，餐廳食肆都會出現等位嘅情況，大家通過食嚟傳達一份情感。廣州人話齋：做嘢都係為咗揾兩餐嗻，辛苦揾嚟自在食。廣州人熱愛生活，識得創造財富，所以識飲識食。

好味豬腸粉

廣州人中食粥粉面，豬腸粉就係其中一樣。豬腸粉可能係因為又長又圓碌碌啩？好似條豬腸咁樣，所以廣州人叫佢做豬腸粉。

食豬腸粉點樣食都得，你可以凈係用熟油加豉油撈住嚟食，又可以凈係放辣椒醬，勁啲嘅咪牛腩豬腸粉啰，灑啲芝麻上去，食起身又夠香，咁又得嘎，再唔係落啲蠔油或者鮑魚汁。

以前小北路有間國營廠，專門生產粉類食品，其中就有豬腸粉嘞。嗰間廠是當街嘅，你行過都可以睇到工人喺度做緊嘢。廠房里邊熱氣騰騰，嗰啲粉整到好大塊，喺條半人工半機械嘅生產線度慢慢咁輸送出嚟，有工人就對呢啲成品進行切分，其中就有人將佢卷成豬腸粉。當時呢間國營廠生意好旺嘎，普通市民排住隊嚟買粉，買豬粉，仲有啲單位食堂、國營小食店、酒樓賓館都有嚟攞貨。我嗰陣時住喺小北路嘅大石街，阿媽落班就經常喺呢度買豬腸粉啰，因為佢知道我中意食吖嘛。

阿媽整豬腸粉，通常切成一碌碌，用盤裝住，放喺鑊入面隔水嚟蒸。蒸熱咗之后就畢啲瓊咗嘅豬油倒入豬腸粉，再倒入豉油一齊撈勻佢，咁就食得嘎啦。當啲豬油一倒入熱氣騰騰嘅豬腸粉即刻就會融化，豬油獨特嘅香味同埋豉油香味就一齊隨住豬腸粉嘅熱氣飄散出嚟，即時成間屋都香噴噴。面對住咁鬼香嘅豬腸粉，我會食到好猴急。其實豬腸粉放花生油都好香嘎，放豬油就更加香同埋有意思，豬油撈豬腸粉，雙豬成趣。后嚟先至知道，其實豬油價錢平過花生油，原來阿媽係為咗慳錢先至放豬油嘅。

食豬腸粉，真係由細食到大。做細路哥嗰陣，婆婆食早餐就成日帶我出去食豬腸粉，食完豬腸粉就去市場買餸。而家都有食豬腸粉，所唔同嘅係，而家講究飲食健康，豬油改成粟米油，風味截然唔同曬。有快餐店推出珍珠腸粉，我以為係乜嘢新嘢，一睇，咪就係豬腸粉。唉，時代同生活都改變咗，豬腸粉都要與時俱進嘞。

這篇有關于廣州舊事(一)的文章，就為您介紹到這里，希望它對您有幫助。